رہین دشت

غریق فکر ہوں کہ مدت سے کچھ نہیں بدلا

صف دراز میں ساکت گمان سارے ہیں

درون سینہ ہے اک قلب ناصبور ایسا

شکار جس کے تغیر کے عزم سارے ہیں

یقیں کی آخری حد سے پلٹ کے دیکھا کیا

نقوش پا کے تعاقب میں وہم سارے ہیں

بے انتہا کی محبت میں انتہائے جاں

گزر مقام سے، آگے وصال سارے ہیں

حذر اے قیس تو صحرا سے رہ ذرا محتاط

گیاہ لیلی سے پہلے سراب سارے ہیں

تری بساط ہی کیا ہے اے مردک ناداں

رہین دشت سے بہتر رحیل سارے ہیں